«Қазақстан Республикасы Стратегиялық жоспарлау және реформалар агенттігі Ұлттық статистика бюросының Ақпараттық-есептеу орталығы» шаруашылық жүргізу құқығындағы республикалық мемлекеттік кәсіпорны қызметінің мәні мемлекеттiк монополияға жатқызылған салалардағы қызметтi жүзеге асыру болып табылады.

Кәсіпорынның мақсаты статистиканың барлық бөлімдері бойынша ақпараттық-статистикалық жүйелерді, дерекқорды қалыптастыру және жүргізу, пайдаланушыларға статистикалық ақпаратты заңнамада белгіленген тәртіппен ұсыну болып табылады.

Қойылған мақсатты іске асыру үшін Кәсіпорын мемлекеттік монополияға жататын қызметтің мынадай қызмет түрлерін жүзеге асырады:

• 1) уәкілетті орган ведомствосының аумақтық бөлімшелері мен респонденттер ұсынған, жалпымемлекеттік статистикалық байқаулар мен ұлттық санақтар кезінде алынған бастапқы статистикалық деректерді жинау, өңдеу, сондай-ақ алынған әкімшілік деректерді және (немесе) балама деректерді өңдеу және ресми статистикалық және талдамалық ақпаратты қалыптастыру кезінде электрондық түрде өңдеу кезеңінде оларды сақтау;
• 2) ақпараттық-статистикалық жүйелерді, дерекқорларды және олардың тұғырнамаларын, статистикалық тіркелімдерді, уәкілетті органның интернет-ресурстарын қалыптастыру, қолдап отыру және жаңартып отыру;
• 3) статистикалық жарияланымдарды қалыптастыру және статистикалық ақпаратты тарату графигіне сәйкес уәкілетті органның таратуына жататын ресми статистикалық ақпаратты, сондай-ақ ұлттық санақ қорытындылары туралы ақпаратты тарату;
• 4) ресми статистикалық ақпаратты тарату графигінде көзделмеген статистикалық және талдамалық ақпаратты қалыптастыру жатады.

Тауарларды, жұмыстарды, көрсетілетін қызметтерді өндірумен технологиялық байланысты қызметтің мынадай түрлерін жүзеге асырады:

• 1) статистикалық байқау жүргізу процесін қамтамасыз ету;
• 2) статистикалық ақпараттық жүйелерді, дерекқорларды және ақпараттық-коммуникациялық инфрақұрылымды және мемлекеттік статистика саласындағы уәкілетті орган ведомствосының (бұдан әрі – уәкілетті орган ведомствосы) және оның аумақтық бөлімшелерінің ақпараттық жүйелерімен технологиялық байланысты инфрақұрылымын дамыту, сүйемелдеу, ақпараттандыру объектілерімен интеграциялау;
• 3) ақпараттық қауіпсіздік шеңберінде уәкілетті орган ведомствосының электрондық ақпараттық ресурстарының, ақпараттық жүйелерінің және ақпараттық-коммуникациялық инфрақұрылымының сыртқы және ішкі қатерлерінен сүйемелдеу;
• 4) мемлекеттік органдармен, респонденттерімен және статистикалық ақпараттың пайдаланушыларымен ақпараттық өзара іс-қимылды қамтамасыз ету, уәкілетті орган ведомствосының ақпараттық-коммуникациялық инфрақұрылымын пайдаланушыларға техникалық қолдауды қамтамасыз ету;
• 5) әкімшілік деректерді ресми статистикалық ақпарат қалыптастыру кезінде пайдалану мақсатында ақпараттық-коммуникациялық технологиялар арқылы олардың сапасын бағалауға қатысу;
• 6) бастапқы статистикалық және (немесе) әкімшілік және (немесе) баламалы деректер, мемлекеттік ақпараттық жүйелер мен мемлекеттік дерекқорлар деректері негізінде демографиялық процестерді болжау.