Өткен жылғы маусыммен салыстырғанда тарифтер су бұруға – 43,5%, суық суға – 36,7%, орталықтан жылытуға – 33%, электр энергиясына – 31,7%, қоқыс шығаруға – 30,7%, ыстық суға 30,4% өсті.

Тұрғын үйді жалға алу құны 11,1% өсті. Баға шаштараздар мен жеке қызмет көрсету орындары қызметтеріне – 13,6%, демалыс және спорттық іс-шаралар саласындағы қызметтеріне – 13,3%, денсаулық сақтау қызметтеріне – 12,7%, ұялы байланыс қызметтеріне – 12,4%, салт-жора қызметтеріне – 12%, кешенді демалыстарды ұйымдастыру қызметтеріне – 11,5%, үй жөндеу қызметтеріне – 9,7%, санаторийлер, қоғамдық тамақтандыру қызметтеріне 9,4%-дан жоғарылады. Таксимен жол жүру – 12%, қалалық автобуспен – 10,1%, жолаушылар теміржол көлігімен – 8,3%, қалааралық автобуспен 2,9% қымбаттады.

Баға деңгейі отандық құрастырма жаңа жеңіл автомобильдерге – 21,7%, фармацевтикалық өнімдерге – 11,2%, киім және аяқ киімге – 11,1%, жиһаз және үйге қажетті заттарға – 10,1%, жеке қолданылатын тауарларға – 8,4%, құрылыс материалдарына 6,2% өсті. Тас көмір - 10%, сұйытылған газ баллондағы 9,7% қымбаттады.

Бағаның өсуі минералды және ауыз суға – 16,3%, жаңа жиналған жемістерге – 15,7%, күрішке – 12,5%, алкогольді ішімдіктер және темекі өнімдерге – 12,3%, жұмыртқаға – 12,1%, салқындатылған сусындарға – 11,9%, жеміс және көкөніс шырындарға, жаңа ауланған балыққа – 11%-дан, кондитерлік өнімдерге – 10,7%, сары майға – 10,4%, бірінші сұрыпты ұннан пісірілген бидай нанға 9,1% тіркелді. Бағаның төмендеуі пиязға – 40,4%, қарақұмық жармасына – 23,1%, күнбағыс майына – 22,3%, ақ қауданды қырыққабатқа – 22,1%, құмшекерге 5,6% байқалды.

Өңірлер бөлінісінде 2024 жылғы маусымда инфляция жылдық мәнде орташа республикалық деңгейден асатын тоғыз өңірде қалыптасты, олардың ішінен ең жоғары Қарағанды (10,8%), Маңғыстау (10,3%) облыстарында, Астана қаласында (10,1%).

Инфляция – бұл халық жеке тұтыну үшін сатып алатын тауарлар мен қызметтердің белгіленген тізіміне бағаның орташа деңгейінің уақыт бойынша өзгеруін сипаттайтын көрсеткіш.

Салым – көрсеткіш бойынша пайыздық өзгерістің инфляцияның жалпы мәніне әсер ету.

Инфляция деңгейін сипаттайтын тұтыну бағаларының индексі халық жеке тұтыну үшін сатып алатын тауарлар мен қызметтерге бағаның жалпы деңгейінің уақыт бойынша өзгеруін көрсетеді.

Тұтыну бағаларының индексін есептеу екі көзден алынған ақпарат негізінде жүргізіледі:

• осы мақсаттар үшін арнайы іріктелген сауда нүктелерінде және қызмет көрсету орындарында оларды тікелей тіркеу арқылы жиналған бағалардың өзгеруі туралы деректер;
• халықтың нақты тұтыну шығыстарының құрылымы бөлігінде үй шаруашылықтарын зерттеу материалдары.

Бағалардың өзгеруі туралы ақпарат жинау қалалар мен аудан орталықтарының іріктемелі тобы бойынша, барлық облыс орталықтарында, республикалық маңызы бар қалаларда және астанада жүзеге асырылады. Сауда және қызмет көрсету саласының базалық кәсіпорындарын таңдау жергілікті жерлерде жүзеге асырылады. Зерттеуге әртүрлі сауда жағдайлары бар және жаппай сұранысқа ие тауарларды (қызметтерді) үнемі өткізетін кәсіпорындар ұсынылуы үшін сауданың және ақылы қызметтердің барлық түрлерінің объектілері іріктеледі.

Тұтыну бағаларын байқау және ТБИ есептеу үшін тауарлар мен қызметтер жиынтығы Қазақстанның барлық өңірлері үшін олардың бірыңғай іріктемесін білдіреді. Тауарлар мен қызметтердің тізімі 508 позициядан тұрады, оған халықтың тұтынуында ең көп үлес салмағын алатын ең өкілді түрлер кіреді.

Бағалар туралы ақпарат жинауды баға тіркеушілері тауарды (көрсетілетін қызметті) өткізу орындарында тікелей жүргізеді. Тексеру жүргізілген күні төленген тауарлардың бағасы, салықтарды қоса алғанда, бірақ оларды жеткізгені үшін қосымша алымдарды қоспағанда тіркеледі.

• Тұтыну бағаларының индексі және туынды көрсеткіштер
• Қазақстан Республикасындағы жекелеген тауарлар мен көрсетілетін қызметтердің бөлшек сауда бағалары
• Қазақстан Республикасындағы әлеуметтік маңызы бар азық-түлік тауарларына баға индексі және орташа бағалар